لێدوانی کۆدار سەبارەت بە شەهیدبوونی رۆژنامەوان نۆژیان ئەرهان

دەسەڵاتێک بەخوێنى میدیاکاران, ژنان, تێکۆشەران و خەڵکەکەى خۆى خوانى دوژمنانى گەلەکەى بڕازێنێتەوە, خۆیشى دەبێتە پارووێکى خوێنین بۆ هەمان ئەو زوحاکەى تا کۆتا لەخزمەتی دابووە.

لە رۆژى 3ى ئادار و لە بەرەبەیانى هاتنى بەهارێکى نوێ و هەڵمەتێکى نوێى گەلى کوردى ژێردەستە و داگیرکراو  بۆ بەرەو ئاسۆى ئازادی, دەست و پێوەند و نۆکەرانى دوژمنى خوێنخوارى سەدان ساڵەى کورد, جارێکى تر ژێردەستی خۆى سەلماندەوە و لە پەیامێکى تریاندا خوێنى ژنە رۆژنامەنووس و تێکۆشەرێکى کوردى ترى لەسەر سینى ئاڵتوونى پێشکەش بە دوژمنان کرد.

(نوژیان ئەرهان) کە زیاتر لە 10 ساڵ بوو بە پێنووس و کامێراکەى لە هەوڵى بەهێزکردنى تێکۆشانى ئازادى ژندا بوو, لە هەر کوێیەک بووبێت ئەو گرفت و ئازار و هەروەها سەرکەوتن و دەستکەوتەکانی گەلەکەى رۆماڵ کردووە و مۆرکى خۆى لەچەندین شاکارى میدیاکارى داوە و هەرگیز ناو و ناوبانگ نەبوون بە ئامانجی.

(نوژیان) چ وەکو (قەڵغانى زیندوو) لە هەنگاونان بەرەو چیاکانى کوردستان بێت, چ وەکو هەڵگرانى رێبازى (گوربەت ئەللى ئەرسۆز) و هەموو ئەو ژنە بوێر و بەجەرگانەى, چاونەترسانە و ئەگەر بە بەهاى ژیان و گیانیشیان بێت خەبات و تێکۆشانیان کرد بۆ هەڵدانى ئەو پەردە رەشەى دوژمنانى کورد و هاوپیشەکانیان دەیانەوێت کردە نامرۆڤانەکانى خۆیانى پێ بشارنەوە. 

ئەو زیهنییەتەى هەمیشە خوازیارە میدیاکارانى ئازادیخواز و تێکۆشەرانى رێگەى حەقیقەت بە ئاقارى سەردەشت عوسماندا ببات و رووى دەیان چەکى دوژمنەکەى بکاتە ژنە چالاکوانێکى مەدەنى ئێزیدخانى وەک (نازێ نایف) و دەیانى تر, گومانى ئەوەشى لێدەکرێت جگە لە هەموو میدیا و میدیاکارێکى ئازادیخواز, هەموو دەستکەوتێکى گەلەکەشى بکاتە قوربانى بەرژەوەندییە تەسک و تەنگەکانی خۆی.

دواى شەهیدکردنى دەنیز فرات لە مەخموور و دواى ساڵێکیش لە شەهید کردنى رۆژنامەنووس (ئاگر بانەیی) لە شەنگاڵ لەلایەن بەشێک لە چەتەکانى دەوڵەتى تورک بەناوى (داعش)ەوە, ئەمجارەیان هەر لە شەنگاڵ و بەشێکى تر لە هێزەکانی دەوڵەتى تورک بەناوێکى ترەوە بەڵام بە بەکارهێنانى ئاڵاى هەرێمى باشوورى کوردستان راستەوخۆ هاوشان لەگەڵ‌ دەستکەوتەکانى فیداییانى ئێزیدیخان, ژنە میدیاکار و تێکۆشەر ( نوژیان ئەرهان)یان کردە ئامانج.

بەناوى کۆمیتەى راگەیاندنى کۆدار ەوە, لەکاتێکدا ئەو جۆرە هەوڵ و پەلامارە دڕندانانەى هەر نرخێکى گەلەکەمان دەکاتە ئامانج بە توندى شەرمەزار و ریسوا دەکەین, هاوکات پەیمانى تێکۆشانى قەڵەم بۆ ئەو شەهیدانە و هەموو شەهیدانى میدیاکار دووپات دەکەینەوە. لێرەشەوە سەرى رێز و نەوازش بۆ شەهیدى رێگەى حەقیقەت ( نوژیان ئەرهان ) نەوى دەکەین و سەرەخۆشى لە کەسوکار و هاوڕێ و هەڤاڵانى دەکەین.

بانگەوازیشمان بۆ هەموو میدیاکارانى کورد و بەتایبەتیش میدیاکارانى باشورى کوردستانە کە بێدەنگ بوونمان بە فیڕۆدانى رەنج و ئامانجەکانى (سەردەشت عوسمان, سۆرانى مامەحەمە, کاوە گەرمیانی, وەداد حسێن, دەنیز فرات, ئاگر بانەیی) و دواجاریش ( نوژیان ئەرهان)ە, بۆیە دەبێت هەموو بوێرى و سەربەرزییەکمان بنوێنین لە خستنەڕووى حەقیقەت و ئاشکراکردنى رووى راستەقینەى بکوژانى هاوپیشە و هاوکار و هاوڕێیانمان, ئەگەرنا هەمان ئەو زیهنییەتە یان ئەوەتا هەموو میدیاکارێکی ئازاد دەکاتە ئامانجی قڕکردنی دەنگی ئازادی, یان وەک نۆکەران بە ئاقاری تەسلمیەتمان دەبات.

کۆمیتەى راگەیاندنى کۆدار

23/3/2017