گەلانی جیهان لە هەلومەرجێکدا بەسەر دەبن کە شەڕە ماندووکەرە قەومی و مەزەبێکان لە لایەک و قەیرانە ژینگەیی و کۆمەڵایەتێکان لە ئالیەکی تر، رۆژانە سەدان کۆژراو و هەزاران بریندار و میلیۆنان ئاوارەی لێدەکەوێتەوە. لە بارۆدۆخێک کە "جەنگی جیهانی سێهەم" رەهەندی بەڕبڵاوتری لەخۆوە دەگرێت، گەلانی رۆژهەڵاتی ناوین چێتر تەحەمولی هێزە دەستێوەردەر و هەژمون گەراکان ناکەن. هەر بۆ ئەوەشە لە هەر شوێنێک دەسترێژی بکرێتە سەر پێکەوەژیانی ئەو گەلانە لە شوێنە خۆڕاگری ئاوا دەبێت. بەرخۆدانی کۆمەڵانی خەڵک لە ئەفغانستان، ئیراق و فەلستین لە بەرامبەر هێزە داپلۆسێنەر و دەسەڵاتخوازەکان بەشێک لەو ڕاستیە دەنوێنێت. نەبەردی شەش ساڵە لە سوریەش بە دامەزراندنی "کۆنفدراسیونی باکوری سوریە" بە پێشەنگایەتی گەلی کوردستان و هێزە گۆڕانخوازەکان بە ئاراستەی سەقامگیری هەنگاو دەنێت. ئیتر هێرشەکانی داعش، موداخیلاتی تورکیە و هەروەها بێ عەهدێکانی هێزە هەژمونگەراکانیش ناتوانێت ببێیە لەمپەرێکی جدی لە پێش دامەزراندنی "نەتەوەی دیموکڕاتیکی سوریە".


 

لە وەها شەرتومەرجێکدا کە "ئیران"یش وەک یەک لە یاریزانانی سەرەکی رۆژهەڵاتی ناوین بۆ ئەوەی "پڕیشکەی ئاگری دەستێوەردانە جیهانێکانی" وێنەکەوێت، سەنگەرەکانی خۆی بردۆتە دەرەوەی سنوورەکان. ئەمە بۆتە هۆکارێک کە وڵاتانی عەڕەبی و دراوسێکانی ئیران هەروەها دەوڵەتانی ئەوروپی و ئامریکاش گۆمان بخەنە سەر ئەم هەنگاوانەی ئیران و خوازیاری ڕاوستانی ماجەراجۆیێکانی ئەو رژیمە بن. ئەوە لە حاڵێکدایە کە "هێزە دیموکڕات و گۆڕانخوازەکان" بەردەوام حکومەتی ئیرانیان بۆ چارەسەرکردنی کێشەکان لە رێگەی گوتوبێژ و بە شێوازی سیاسی بانگهێشت کردووە، بەڵام "عەقلیەتی سەربازی-ئاسایشی و ڕوانگەی ناوەند-پەڕاوێز"ی کاربەدەستانی حکومەت بۆتە لەمپەر لە بەرامبەر چارەسەری کێشەکان. پێویستە بگوترێت لێدانی ئیتیکتی دەستکردی "جیاخوازی" بە بیانۆی ساختەی "پاراستنی تەمامیەتی ئەرزی وڵات" ئیتر ناتوانێت گەلانی نارازی لە چنگ رژیمی دەسەڵاتداری ئیران لە تێکۆشان لە هەمبەر ئەو سیستەمە ناکارامە و گەندەڵە سڵ بکاتەوە.


 

بەو حاڵەوە کۆرد کە وەک فاکتەری بنەڕەتی "هێوری و سەقامگیری" لە رۆژهەڵاتی ناوین لە لایەک و سەرکەوتووترین هێز لە بەرامبەری دواکەوتوویی داعش لە لایەکی تر، دەستی خۆی بۆ یەکێتی و لێکنزیکبونەوەی لایەنە چەپ و دیموکڕاتەکان درێژ کردووە. چونکە ئەوان لەسەر ئەو بڕوایەن کە یەکریزی ئەو هێزانە بە یەکێتی و کۆدەنگی کوردستانیان تێپەر دەبێت. لە کەشوهەوایەک کە سەرجەم لایەنەکانی تێگیرساو لە رۆژهەڵاتی ناوین، بەدوای بەشەماڵو داڕشتنێکی نوێ لە ناوچەکە بە پێی بەرژەوەندێکانی خۆیانن، لێرەدا کورد ناتوانێت خوێ لەقەراخ و بێ کاریگەر بێڵێتەوە. گەر کوو هەر کەس لەسەر ئەو بڕوایەیە کە رۆژهەڵاتی ناوین لانکەی شارستانیەت و پێگەیشتنی مرۆڤایەتیە، ئەمەشی لا پەسەند بووە کە "کوردان" وەک پێشەنگانی نوێ ئاشتی و ئارامی لە ناوچەکە خاوەن رۆڵ بوونە لە دژی هۆڤایەتی داعش و هێزە ستاتۆپارێزەکان. کە واتە، ئەم پرسە دێتە ئاراوە کە "پێشەنگانی سەقامگیری و شۆڕشی نوێ رۆژهەڵاتی ناوین" پێویستە لەسەر "مافی دیاریکردنی چارەنووسی خۆیان" پێداگر و بڕیاردەر بن. هەربۆیە لە هەلومەرجی ئیستاکەدا دەتوانین بێژین شوێنی جێبەجێکردنی ئەو بڕیارانە بە دامەزراندنی "کۆنگرەی نەتەوەی کوردستان" دەستەبەر ئەبێت.


 

ئەگەرچی لەساڵانی رابڕدوو دا، هەنگاوگەلێکی ئەرێنی بۆ هاتنە لای یەکی کوردان ژبۆ یەکێتی هەمبەر هێزە زۆرگۆکان هاتۆتە ئاراوە بەڵام ئەو هەنگاوانە بەردەوام رووبەڕووی ئاستەنگی ناوچەیی و جیهانی بۆتەوە. ئەمە خۆی نیشان دەدات کە یەکێتی کوردان تا چ ڕادەیەک نیگەرانی هێزە دەسەڵاتدار و هەژمونگەراکانی لێکەوتۆتەوە. لەحالێکدا ئەگەر دەوڵەتانی دراوسێ و هێزە جیهانێکان بەدوای ئاشتەوایی و سەقامگیری لە رۆژهەڵاتی ناوین و بنەبڕکردنی توندوتیژێکان لە وڵاتانی خۆیان دەگەڕێن گەرەک ببنە یارمەتیدەر بۆ دامەزراندنی "کۆنگەری نەتەوی کوردستان". پێکهاتنی ئەو کۆنگرەیە نەک تەنیا لە دژی بەرژەوەندی هیچ لایەنێکی دیموکڕات و پێشکەوتووخواز نیە بەڵکوو دەبێتە مایەی ئارامی و ئاسودەیی خودی ئەو وڵاتانە. لە لایەکی دیکەشەوە "کۆنگرەی نەتەوی کوردستان"، تریبۆنێک نیە بۆ بڵاوکردنەوەی فکری "نەتەوەگەرایی تووندئاژۆ، حیزب گەرایی و هەرێم چێتی، ڕەگەز پەرەستی، دین پەرەستی و دژە ژینگە"یی. بەپێچەوانە، ئەو گۆنگرەیە دەتوانێت هەموو "لایەنە گۆڕانخواز و دیموکڕاتەکان، بزووتنەوەکانی یەکسانی رەگەزی لەسەر بنەمای ئازادی ژن، حەڕەکەتەکانی ئیکۆلۆژی و چالاکانی مافی مرۆڤ" لە ئامێز بگرێت و داوایان لێبکات سەڕەڕای جیاوازی لە بیرو بۆچووندا، بەرەو یەکریزی و یەکێتی مایەندە هەنگاو بنێن.


 

بۆ ئەم مەبەستەو لە رۆژانی ڕابردوودا، بانگەوازیەک لە لایەن "کۆما جڤاکێن کوردستان- ک ج ک " لەسەر گرینگی "راوێژی نەتەوی و یەکێتی هێزە کوردستانێکان" لەو شەرتومەرجە هەستیاری ناوچەکەدا ئاراستەی لایەنەکان کراوە. ئیمە وەک پژاک و کۆدار، ئەو دەسپێشخەریەی هەڤاڵانمان لە ک ج ک و هەر هەنگاوێکی تر لەسەر دەستی هەر حیزب و لایەنێکی تر بەرز دەنرخێنین و پاڵپشتی لێدەکەین. وەک یەک لە بزووتنەوە سەرەکێکانی پێشەنگ لە ئیران و رۆژهەڵاتی کوردستان بانگ لە هەموو رێکخراو و لایەنەکانی کوردستانی، چالاکانی مافی مرۆڤ، ژنانی تێکۆشەر و ژینگەپارێزانی ماندوونەناس و هەروەها رووناکبیرانی کوردستانی دەکەین ئەو دەسپێشخەریەی وەک هەنگاوێکی ئەرێنی بۆ چارەسەری پرسی کورد و یەکگرتوویی دژ بە مەترسیەکانی هەنووکەیی ببینن و هەوڵدانی خۆیان بۆ بەهێزکردنی بکەن. ئیتر ئەبێ بزاندرێت کە گەلانی کوردستان وانەیەکی گەورەیان لە رێکەوتننامەکانی "قەسری شیرین، سەعد ئاباد، سایکس-پیکۆ و لۆزان" وەرگرتووە هەر بۆیەش لە هیچ شەرتومەرجێکدا ئامادە نین ئەم دەرفەتانە بۆ ئاواکردنی دیموکڕاسی و گەیشتن بە ئازادی لە کیس بدەن.


 

کۆمەڵگای دیموکڕاتیک و ئازادی رۆژهەڵاتی کوردستان- کۆدار

٢۵ی ئاگۆستی ٢٠١٧ی زایینی